Nash Ngcobo
UMASIPALA uMsunduzi odume ngele-City of Choice umema izinhlangano zemidlalo ezifuna ukusebenzisa iHarry Gwala Stadium ukuba zifake izicelo.
Le nkundla okuyiyona yodwa esezingeni elifunwa yiPremier Soccer League, ayinaqembu eliyisebenzisa njengenkundla yasekhaya.
Lesi simemo esikhishwa wuMasipla uMsunduzi, silandela imibiko yakamuva ebonakale ezinkundleni zokuxhumana ebigxeka isimo lenkundla ekusona esingesihle ngotshani obungasikiwe nokunye okuyehlisa isithunzi.
Ihhovisi lezokuXhumana likaMasipala lithi ukukhula kotshani kudalwe yizimvula zakamuva kanti alikho iqembu elisebenzisa le nkundla okwamanje.
Liqhubeka lithi sekuqaliwe ukusetshenzwa kule nkundla kanti selivule izingxoxo kulabo abafuna ukusebenzisa iHarry Gwala njengekhaya lemidlalo yabo. “UMkhandlu woMsunduzi uzibophezele ekulekeleleni nasekugcinweni kwazo zonke izakhiwo zawo zisesimweni esigculisayo futhi zisetshenziswe yilabo abazidingayo. “Uhlaka nohlaka oluzophumelela ukusayina isivumelwano, luzozibophezela ngokuthi okuvunyelwene ngakho kungabi yimfihlo, kwaziwe yiwo wonke umuntu futhi kungancishi abanye amathuba okusebenzisa isakhiwo somphakathi uma singasetshenziswa ngaleso sikhathi,” kusho uNkk Nontobeko Mkhize oyiMenenja yezokuXhumana kuMasipala uMsunduzi
Okwenzeka phakathi kweRoyal AM esidliwe wuMqoqi weNtela nokuduba kweMaritzburg United kube yihlazo elikhulu kwezokuphathwa kwezakhiwo zikamasipala.
ICity of Choice ayisenalo iqembu elidlala esigabeni esikhokhelayo njengoba iClub of Choice isiyiDurban City futhi isizinze eThekwini.
Kukho konke lokhu kusolwa indlela uMkhandlu uMsunduzi ovumelane ngayo neRoyal AM ngokusetshenziswa kweHarry Gwala Stadium.