Nash Ngcobo
UKWETHULWA kweMenenja kaMasipala uMsunduzi uMnuz Felani Simon Mndebele, kulokozisa inhlansi yethemba lokubuyiselwa kwalo masipala ubungcono obuyibo ngeminyaka yama_1990’s.
Lokhu kungezinye zezifiso zikaMeya uKhansela Mzimkhulu Thebolla azisho emcimbini wokwethulwa kukaMndebele eCity Hall ngoLwesihlanu.
Ukhuluma kanje umeya yingenxa yokuthi kuningi ukunganeliswa komphakathi yindlela ezinye zezisebenzi zalo mkhandlu ezisebenza ngayo.
Kukhalwa ngobuvila, ukungawuhloniphi umphakathi ongabakhokhi bentela, ukungcola kwedolobha nokubola kwezakhiwo zalo, osekuxoshe abavakashi nabantu abafisa ukuzohweba kulona.
Le lidolobha eliyinhloko yeKwaZulu_Natali lidinga ukuphathwa yisandla esiqinile kubaholi, kuphele izisebenzi ezisebenza sengathi kukoninalume bazo kulona.
Ukubuyiswa kwesithunzi nenhlanzeko, ukuvuselelwa kwezakhiwo ezibolile nezibhidlikayo yinto okufanele imenenja ihlale phezu kwako.
Ukubeka eceleni ubungani ngokwepolitiki, kodwa kuqhume isitswebhu kwabenza okuphambene nomthetho, kungakhathaleki ukuthi usetiyeni likabani, yizinto ezizobuyisa isithunzi kubaholi bomkhandlu.
Ulwazi olungangatshazwa lwezokuphatha kuMndebele, yilona kanye oludingekayo noluzosiza kuphela uma ethola ukwesekwa ngozakwabo nethimba aliholayo.
Ukubuyiswa kwesithunzi sedolobha nokuqinisa imikhankaso yokuheha osomabhizinisi nabatshali zimali, kuzolethela ubuholi obusha enkulu inhlonipho.
Sekuyisikhathi sokuzinuka amakhwapha kubaholi abamnyama ukuthi le liphunga elibolisa idolobha, sekufanele liqedwe nya njengoba livumbuke ngaphansi kobuholi babo.