Inkosi u-AJ Luthuli akafanga ngengozi kodwa wabulawa

Nash Ngcobo

UMPHAKATHI waKwaDukuza namaphethelo uphinde wahlangana ngenhloso yokukhumbula nokuqhakambisa ifagugu leqhawe lalo Inkosi u-Albert John Mvimbi Luthuli emcimbini wokwethulwa kweLuthuli Walk&Fun Run eThembeni KwaDukuza muva nje.

Kule-Fun Run ye-10 eyethulwe endaweni okwabulawelwa kuiyona uLuthuli ngoNtulikazi 21 (July) 1967, kuphakanyiswe ukugujwa kwamagalelo ale liqhawe ngendlela ehloniphekile nokuthi kungaphambukwa ezinkambisweni nasezinkolelweni zakhe.

Lo luhambo oluzophelezelwa umjaho wokuzijabulisa uzosukela ekhaya likaLuthuli ku-3233 Nokukhanya Luthuli Street ngo-7h00 ekuseni.

Abazohamba ibanga lika-11,05 km elingenelwa ngo-R175 kuthi elika-7.7km lokugijima likhokhelwe uR155.

Lo mjaho nohambo uzokwandulelwa wukuzivocavoca (aerobics) okuzoqala ngo-6h00 ekuseni endaweni efanayo. Izingane zizojoyina ngoR50 kuthi abempesheni bakhokhe uR80.

Konke lokhu kuzokwenzeka ngoNtulikazi 25 kanti kugqugquzelwe kwahlelwa iLuthuli Museum ngokubambisana noMasipala iLembe, iKwaDukuza, i-Enterprise Ilembe, uMnyango wezeMidlalo, amaSiko nobuCiko ezingeni likazwelonke.

Ezinye izinhlangano ezingafunanga ukusala ngaphandle yi-United Congregational Church of South Africa, iMandeni Athletic Club, Abakhumbuli bakaLuthuli nomndeni kasingaye uLuthuli.

Emva komjaho abagijimi bazoqaqa amajaqamba ngokuhlanganyela nabathandi bomculo njengoba kuzoba nekhonsathi lejazz eMsiki Lounge elihlelwe yiGroutville Jazz Club.

Kule likhonsathi kuzoshiyelana inkundla uThulile Zama, uMthobisi Mthalane, umculi weHip-hop obizwa ngeGroutville langempela, abaculi bendawo kuvale uDj wendawo.

Kungenwa ngoR100 kanti amathikithi aseyatholakala kwaPick n Pay naseWebticket. Ikhonsathi liqala ngo-18h00.

UMnyango wezeMidlalo nobuCiko uzonikela ngama-voucher ahlobonhlobo inani lawo elilinganiselwa ku-R100 000. Ungashiywa.

ULuthuli wayengumholi owayeyikhathalele inhlalo enhle nentuthuko yomphakathi wakhe njengoba ayengumlimi, umfundisi, ethanda ukuhamba ibanga elide, uthisha, usopolitiki futhi eyinkosi ngokokuzalwa.

Konke lokhu kwakukhombisa ukuba nempilo ephilile engenazigulo esezibizwa ngamahlala akhona.

Ziningi izikhulumi ezikhulume ngokubaluleka kwalo lusuku kanjalo namagalelo omholi onjengoLuthuli nokuthi ifagugu lakhe liqhakanjiswe kakhulu njengoba lingaqhakanjisiwe ngendlela efanelekile.

UNkk Velile Luthuli obekhulumela umndeni ulibonge kakhulu igalelo leLuthuli Museum nebambisene nabo.

Ulibeke ngembaba elokuthi umlando kaLuthuli kufanele ubhalwe kabusha.

“Wayephile saka uLuthuli eyihamba njalo lendlela esuka emzini wakhe eya esitolo sakhe KwaNonhlevu, wayengeke angasizwa kumbe angasiboni isitimela.

“Inkantolo eNkulu yaseMgungundlovu ishilo ngoMfumfu 2025 ukuthi uLuthuli wabulawa, akabanga sengozini.

Umlando udinga ukubhalwa kabusha, iqiniso laziwe njengoba linjalo,” kusho uNkk Luthuli.