Nash Ngcobo
UKUTAKULWA kukaMasipala Impendle ngomholo wabasebenzi wuMnyango wezokuBusa ngokuBambisana neziNdaba zoMdabu, KwaZulu-Natali kuphoqa lo mnyango ngokuqinisa isandla ekuphathweni kwabo bonke omasipala.
Lokhu kulandela ukugcinwa kwesithembiso salo mnyango sokuholela abasebenzi bakaMasipala Impendle ngoZibandlela njnegoba bebengaholelwe. UNgqongqoshe walo mnyango uMfu Thulasizwe Buthelezi owayethembise ukuholela abasebenzi, usigcinile leso sethembiso kulandela ukungabi khona kozinzo kuwo ekuphathweni kwezimali.
UShenge uthe useqoke ithimba elizobhekela ukuphathwa kwezimali elizolekelela uMasipala Impendle. Lokhu kuzobuyisa uzinzo ekuphathweni kwezimali ukuze ungaphimde ungene ehlazweni lokuphelelwa yizimali.
Uthe lokhu uzokwenza kubo bonke omasipala abajwayele ukuzithola benenkinga efanayo neyaseMpendle. Ukhuluma kanje uMasipala uMsunduzi uphuma esimweni esifanayo, nokho okungaqali ukwenzeka.
“Ngingenelele ngokuholelwa kwabasebenzi kungenxa yokubacabangela ukuthi bangabi noKhisimusi omnyama onendlala. Akuvumelekile neze ukuthi umasipala usebenze ngaphansi kwesimo esibucayi.
“Angiphathekile neze kahle ngesimo sezimali sikaMasipaka Impendle esiqale ukubonakala ngoNhlaba, okuze kwangenelela uMnyango wezeziMali ezingeni likazelonke,” kusho uNgqongqoshe Buthelezi.
Uphethe ngokuthi le lithimba aliqokele Impendle, uzoqinisekisa ukuthi lizongenelela kubo bonke omasipala abazithola bekulesi simo
