Nash Ngcobo
ISIKHONDLAKHONDLA senye yezinkampani ezisimamise umnotho waseNingizimu Afrika sizinikele ekuphuculweni kwengqalasizinda yeTheku.
Lokhu kubonakale ngenkathi iToyota South Africa Motors inikela ngezi-R120 (million) uMasipala weTheku wokulungisa ingqalasizinda kwiProspecton Precinct emhlanganweni wakamuva.
IProspecton ihlala iba yisisulu sezikhukhula okugcwaka kuyo amanzi, kume nse ukusebenza.
Inkampani yakwaToyota ezinze kule ndawo ihlala igqemeka engeqiwa ntwala ngenxa yamathantala amanzi agcwala kule mboni uma kunezimvula.
ITheku nalo linenezele ngezi-R450 (million) ukubhekelekwa ukuhanjiswa kwamanzi, ugesi, ukwakhiwa kabusha kwemigwaqo nokuvulwa kwamapayipi azosiza ekuhambeni kwamanzi.
Lezi zigidi ezikhishwe nguToyota obumelwe nguMengameli nesiKhulu esiPhakeme (CEO) uMnuz Andrew Kirby ngezokufakwa kwamapayipi amakhulu azodlulisela amanzi olwandle.
Kuzovulwa nalawo avalwa yizikhukhula unyaka nonyaka bese kudaleka ukuma kwamanzi.
UMeya weTheku obehambisana nobuholi bedolobha, uthe konke okwenziwa yiTSAM yindlela yokuqinisa amaxhama obudlelwano, lezi zakhiwo ezinawo.
“ITSAM ingabatshali zimali abanohlonze ezweni lonkana osekungaphezulu kwama-50 behweba eNingizimu Afrika ikakhulukazi eThekwini,” kusho uMeya uXaba.
Uqhubeke ngokuthi ukwakhiwa nokuvuselelwa kwale ngqalasizinda akuzosizakaka uToyota kuphela, kodwa nezinye izinkampani namabhizinisi aseProspecton.
Udalule ukuthi iTSAM ifaka izi-eziyi-R18 billion emnothweni wezwe njalo ngonyaka. UMasipala weTheku wona ungenisa izi-R6 (million) ngokuqoqa intela kubahIali nosomabhizinisi.