I-Edendale Tech ibuyise udumo lwe-Fast 5’s Netball Challenge

Nash Ngcobo

IKHUMBUZE abalandeli benetball i-Edendale Tech High ukuthi ingompetha baka-2024 beSpar KZN Schoolgirl Fast 5’s Netball Challenge ngenkathi yehlula iSt John’s D.S.G. ngo-8-4 kwifinal yalo nyaka ebise-Epworth High eMgungundlovu.

ISt John’s ebingakaze yehlulwe kulo mqhudelwano ihlangabezane nezimbila zithutha kwi-Edendale njengoba ibilokhu iziqwaqwade emakhanda ezinye izikole ebeziseqoqweni layo.

Igoli lokuqala leSt John’s lingene emva kwemizuzwana engama-25 uqalile umdlalo kanti elokulinganisa le-Edendale lona lingene emizuzwini engama -20 emva kweleSt John’s.

Kuyiwe ekhefini zibambene ngo-1-1 kanti u-Ayabonga Miya no-Azande Ndlovu babelane amagoli ayi-8 kanti iSt John’s yona ithole amane.

ISt John’s ishaye igoli elilodwa esiwombeni sesibili eliqhamuke noNoella Edkins ongomunye wabagadli abebekhaliphile bale liqembu, kodwa ukuhleleka nokuqina kodonga lwe-Edendale, lubavale thaqa abeSt John’s.

Ukuvala kwasani emuva kwe-Edendale, kunikeze abagadli bayo omkhulu umfutho wokuhlohla amagoli elandelana.

Emidlalweni engama-48 emizuzwini engama-384 namagoli angama-682 ashayiwe.

Isicoco sesiFunda saseMgungundlovu seFast’s 5 sisale kanjalo kwi-Edendale Tech High kanti ifinal iphothulwe ngenkulu impumelelo.

Izinhlelo zomqhudelwano wangonyaka ozayo sezihleliwe.

Isiyonke imiphumela namaphuzu ihambe kanje:
Regional Final
Edendale Tech 17 iSt John’s D.S.G. 6
Semifinals

St John’s DSG 8 v Grace College 4, Edendale Tech 14 vs Pietermaritzburg Girls 6.
Pool A
(1) St John’s DSG 15pts (2) Etham College 12pts (3) Russell High 7pts (4) Treverton College 7pts (5)
Maritzburg Christian School 3pts (6) St Nicholas Diocesan College 0 pts.
Pool B
(1) Grace College 13pts (2) Pietermaritzburg Girls 12pts (3) St Anne’s Diocesan College 7pts (4)
Riverwood College 6 pts (5) Greytown High 6pts (6) Zamazulu Secondary 0 pts.
Pool C
(1) Edendale Tech High 15 pts (2) Epworth School 10pts (3) Wartburg Kirchdorf School 7pts (4)
Umvuzo High 6pts (5) Albini Girls High 3 pts (6) The Wykeham Collegiate 3 pts.