Nash Ngcobo.
IMEYA kaMasipala wesiFunda iZululand, ijabulise okwengane iphiwa ithoyizi imemezela ukubakhona kweKaizer Chiefs kwiPrince Mangosuthu Legacy Cup.
Lokhu kubonakale ngenkathi uKhansela Michael “Mkhonyovu” Khumalo enekela umphakathi indlela asebeyihambile ekuheheni iChiefs kulo mqhudelwano. UMashobane uthe abantu bangamangali ukubona iBorussia Dortmund kulo mqhudelwano eminyakeni embalwa ezayo.
Nyakenye uthe kulo nyaka kuzotheleka iziMpofana esho iChiefs, ngempela kube ngawenkehli. Uthe ngalo lusuku kuzobusiseka imindeni eyisithupha ezonikelelwa wumasipala ngezindlu.
Ngakusasa uthe kuzoba nomjaho wokuqala wamahhashi kule ndawo wokuhlonipha uMntwana uPhumzile Buthelezi. Uqhubeke ngokuthi uMangosuthu ohlonishwa ngale midlalo wayewukhonzile lomjaho, ihhashi lakhe lalibizwa -“Utsotsi.” kugibela
IChiefs eqhathwe neNsingizini Hotspurs FC yaseSwatini, ithe iyaziqhenya ngokuba yingxenye yePMLC, iyohlala isamukela isimemo sayo. UVina Maphosa ukhumbuze abaningi ngobudlelwane iChiefs enabo neKZN, kusukela isungulwa kuze kube yimanje. Ubale abadlali eyadla ngabo izicoco asebalala kobandayo nabasaphila. Kulabo badlali ubale uMichael “Bhizzah” Dlamini, uPetrus “Ten Ten” Nzimande, uGerald “Mgababa” Dlamini noSiyabonga “Bhele” Nomvete ukubala abambalwa. Ukhuluma kanje uMaphosa indodana kaShenge uZuzifa uyiMpofana yokuqina nokwenza le liqembu lingaconsi phansi KwaZulu-Natali
Kulo mqhudelwano ozodlalwa ngoMfumfu 11(October), kuzovula AmaZulu neNjampela ngo-9h00. Kuzolandela iKaizer Chiefs neNsingizini Hotspurs ngo-12h00. Ifinal izodlalwa ngo-4h00 phakathi kwalaba abanqobe emidlalweni yokuqala. Amathikithi abiza R50 kanti ayatholakala KwaSpar
