Kudingeka isandla esiqinile ekuphathweni kwale nkundla nezinye zasePinetown namaphethelo
inkundla yethenisi ebinezinkundla (courts eziyi_11) eLahee Park
Nash Ngcobo
UMASIPALA weTheku usuzidele amathambo wabhekana ngqo nomsebenzi wawo wokuvuselela iLahee Park ePinetown esiphenduke umhhume wabaphangi. Lenkundla enkulukazi enenkundla yokubhukuda, ezethenisi eziyi-11, eye-hockey, eye-gymnasium, i-cricket, athletics, inetball, irugby nonobhutshuzwayo, sekuphele iminyaka engama-30 inganakiwe.
Lokhu kuholele ekubhidlokeni kwezakhiwo, ukungasikwa kotshani, ukuthutha kwerugby nehockey maqede yaphenduka ikhaya lezigcwelegcwele.
Igugu nokuziqhenya kwezinhlaka zemidlalo ngale nkundla kuphele isilawulwa wuMnyango wezamaPaki, ezokuNgcebeleka namaThuna.
Akuyona yodwa le nkundla eyehlelwe yizinga cishe zonke zeTheku ngaphansi kobuholi bukaThembinkosi Ngcobo, osewawushiya lomnyango.
Ukuvuselelwa kwale nkundla kulindeleke kudle izi-R3.5 (million) okuyimali okuzobiywa ngayo. Uma isibiyiwe kuzovulelwa izinhlangano zemidlalo ekule nkundla ithuba lokuyisebenzisa ngaphansi kwesivumelwano esithize
Lesi sinqumo sithathwe wuMkhandlu weTheku emva kokuhambela kule ndawo nguSihlalo weCommunity Services Committee uKhansela Zama Sokhabase, osezinhlelweni zokuyibuyisela kwebiyikho ngeminyaka yama-1980’s.
Kuzoqalwa ngohlelo lokuhlanzwa kwale ndawo oluzothatha izinyanga ezintathu, kusikwe utshani obude, kuvuselelwe zonke izidingo zemidlalo enhlobonhlobo. Konke lokhu kuzosebenza ngaphansi kwekomiti elakhiwe ngamalungu ayo yonke imidlalo ekulendawo nokuyilona elizokhipha izikhangiso kulabo abafuna ukuyisebenzisa ngokwezidingo zalowo mdlalo nomdlalo
