Nash Ngcobo
UKUKHISHWA kweNingizimu Afrika kwiLast 16 ye-Afcon 2025 yiCameroon ngo 2-1, makufundise abagadli ukubaluleka kokusebenzisa amandla nobuchule bokushaya amagoli ngokushesha.
Ukujwayeza abadlali ukudlala ndawonye kanjalo nohlobo lwesikimu abasidlalayo, ukwehlisa uvalo lobukhulu bomdlalo, kuzoyisebenzela iBafana Bafana kweyeNdebe yoMhlaba
Ukwehlulwa yiCameroon akusho ukuthi sekuphelile ngeBafana, okubalulekile nje wukuzilungiselela kakhudlwana kukaHugo Broos nethimba lakhe ngemidlalo ezayo.
Lokhu kubonakale ekulahlweni kwamathuba amathathu emizuzwini enga-20 uqalile umdlalo. UBroos kuzomsiza ukubuyisa u-Iqraam Rayners azoqinisa kulaba badlali abangebuthuntu neze, kodwa ababhekwe yisambane kwiLast 16.
URelebogile Mofokeng, uSamukelo Kabini bashaywe yizinga lobukhulu bomqhudelwano, batatazela okuholele ekushwebeni amagoli. USipho Mbule bekufanele uBroos amfake kuqala isiwombe sesibili, engakaqini amandla ezitha.
UBathusi Aubaas usiqnise kahle isisu kanti u-Evidence Makgopa ukwazile ukuxina izitobha zeCameroon njengoba eshaye igoli lokubika ngomzuzu wama-87 elenze kwaba ngu-2-1.
IBafana ibingeyimbi neze, bonke abadlali bebekufanele ukudlala. Kufanele bafunde ukuvalelana izikhala uma kukhona abashoshela phambili ohlangothini lwesinxele nesokudla.
Osekusalele uBroos wukubatholela amazwe azobaqinisa ukhakhayi kwindebe yomhlaba njengoba ezoqala imidlalo yayo ngoNdasa [March|.
