Ingama-23 eyokungenela iComrades Marathon 2026

Nash Ngcobo

IMINGENELO yakamuva yeComrades Marathon 2026 esiqubulo sayo sithi ”Ungapheli Amandla- Ska Fela Moya“ engama-23 ezoginjwa kulenyanga kaNhlolanja (February), emithathu yayo iKwaZulu-Natali.

Umjaho wokuqala oKwaZulu-Natali ubizwa ngeHillcrest Marathon uzoba ngeSonto. Ibanga lawo elizophindwa kabili kanti inhloso enkulu ngawo wukujwayeza abagijimi indawo enemiqansa kwazise iComrades yalo nyaka iyenyukela.

Sekunyaka wama-50 lo mjaho usuka eCity Hall eThekwini uya eMgungundlovu kanti kulo nyaka uzophelela eHollywood Scottsville Racecourse ngoNhlangulana 14 (June).
Lo mjaho okungowama-99 ukhona usuwamukele abagijimi abayi-22 399 ozogijinywa amahora ayi-12 kanti ungowebanga lama-87 km.

Owesibili kuyo le nyanga ungoNhlolanja 15 (Feb) ozobizwa ngeRichards Bay Minerals Marathon osenyakatho yesifundazwe wona ozodla ngebanga eliyithafa.
Owelama owaseBay ubizwa ngeCapital City Marathon ozosukela eCity Hall eMgungundlovu ngoNhlolanja 22 nokuhloswe ngawo ukuvuselela ilukuluku lalabo abasuke bengenele owehlayo osukela kuyo lendawo.

Sisekuwo lo mjaho osude umhlaba wonkana, kubukeka lizogaya ngomunye umhlathi ohlangothini lwamaqembu abagijimi.
Iqembu iNedbank Running Club (NRC) eligqame ngemibala eluhlaza satshani, lisanda kushiyiwa ngosaziwayo nompetha beComrades, asebejoyine iHollywood Athletic Club.

Labo bagijimi ngumpetha wabesifazane uGerda Steyn, uTete Dijana no-Edward Mothibi asebenqobe lo mjaho iminyaka eyahlukene.
Lezi zindaba zokushiya kwabo kwiNRC ziqinisekiswe yimenenja yayo uNick Bester olibeke ngembaba elokuthi le liqembu linenqwaaba yabagijimi abanethalente elingakabonakali.

Laba bagijimi kabezwananga nabaphathi beNRC ngezimali zokubagcina bengamalungu nokukhokhelwa kwabo, okubikwe ukuthi alikwazanga ukumelana nokukhuphuka kwesibalo abasifunile muva nje.
UBester uthe kunabagijimi abasha abayi-10 abasembangweni wezicoco ezinhlobonhlobo zalo mjaho abazobonakala kwiTwo Oceans nayo iComrades Marathon.- Khula Sports