zokuvuswa kweZululand Ultra Marathon ngokubambisana neKwaNongoma Athletic Club ngalo
mjaho oshaya ibuya ngo-Nhlaba 19.
KwaZulu-Natali.
Nash Ngcobo
UKUBUYISWA kweZululand Ultra Marathon 56km esanda kwethulwa yiZululand District Municipaity
kungase kwandise isibalo sabagijimi abasazongenela iComrades Marathon 2026, okumanje aseqalile
amalungiselelo ayo.
IZululand Ultra Marathon izosukela Ondini iphelele KwaNongoma ngoMbasa 19 (April) ngo-6h00,
okulindeleke kuwo izinkumbi zabagijimi nokuphela kwendlala yeminyaka emine kungabonakali
makhono abagijimi bawo.
Lo mjaho usezingeni laleyo okungenelwa ngayo iComrades Marathon eminye yawo ethe chithi saka
KwaZulu-Natal kule nyanga kaNhlolanja (February).
Baningi abagijimi besifunda abazuze okuningi kulo mjaho, kubalwa nalabo abaqhamuka ngaphandle
abaqhakambise amakhono abo kwezejubane.
Isasasa lokubuya kwalo mjaho obukhula ngesikhulu isivinini kusukela wasungulwa ngo-2005,
lihambisana nokubhekwa ngabomvu kwemiklomelo yawo njengoba kukhona abaklonyeliswa
ngezimoto phambilini.
Ushaya ibuya nje lomjaho osungulwe ngo-2005, ubumisiwe kusukela ngesikhathi sokuqubuka kwe-
Covid-19, ephazamise izinhlelo eziningi zezemidlalo nokuphila kwabantu bonkana.
Ukubuyiswa kwalo mjaho ogqugquzelwa yiKwaNongoma Athletic Club ngokusizwa yiZululand District
Municipality kuzophakamisa izinga lokuvakashelwa kwalesi sifunda namadolobha aso, kuhehe
nabatshali zimali.
IMeya yoMkhandlu iZululand uKhansela uMichael ”Mkhonyovu” Khumalo ubonge amagalelo
eNongoma Athletic Club ngokunxenxa ukubuyiswa kwalo mjaho.
“Lokhu kuzofaka ugqozi ezinkampanini ezizimele namazwe anhlobonhlobo ukuzotshala izimali
emadolobheni angaphansi kwalo mkhandlu bese kukhula nomnotho wesifunda, okumanje ukuphila
kwaso kusentendeni kahulumeni,“ kusho uKhumalo.
Ukhuluma kanje uMntungwa indawo yas’ Ondini isemakhaya kanti inodeda ngendlale bomhlaba
ongaqhikizi lutho, injalo nje nesibalo sezakhamizi sikhula unyaka nonyaka.
Le ndawo bekuyiyona ebilethela abantu imisebenzi abebeqashwa emahhovisi ngesikhathi
sikahulumeni waKwaZulu omgasekho, okube noshintsho esethuthelwa eMgungundlovu
naseThekwini sekuphethe uhulumeni wentando yeningi ngo-1994.
Lo mjaho uzohlukaniswa izigaba ezintathu okuyibanga lika-5km Walk & Fun Run, 10km bese kuvala
elika-56km.
Imali yokujoyina kanjalo nemiklomelo yawo isazomenyezelwa khona maduzane nje kanti ugcine
unemihle kakhulu.
Imininingwane yokuwungenela itholakala emahhovisi omkhandlu ku-400 Ugagane Street, ukungena
kwiwebsite: www.zululand.org.za. Abanye bangashayela kulenombolo 035-8745500. Khula Sport