ebalazweni laseNingizimu Afrika.
Nash Ngcobo
UKUZETHEMBA kwabaphathi nabadlali boMkhambathi FC esigabeni seSafa ABC Motsepe ngokufinyelela ezingeni elikhokhelayo, kulindeleke kubonakale le liqembu selidudulana neMillford FC kwiLast 16 yeNedbank Cup khona maduzane nje.
Le liqembu elihlanganise amaWadi angaphansi kwesiFunda seTheku noMgungundlovu, lifisa ukubalwa nalawo agijima esigabeni esikhokhelayo kungekudala, okuzofakazelwa wukuphathwa kwalo ngokuseqophelweni eliphezulu.
Lokhu kuqinisekiswe wumphathi walo uNtuthuko Mlaba obonge kakhulu uMsinsi Resorts ngokubahlelela indawo yokuziqeqesha kanjalo neyokuhlala kwabadlali.
Unxuse nezinye izinkampani ngokulekelela kulokhu abakuthola kuMsinsi, osekufake olukhulu ugqozi kubadlali njengoba behamba phambili kwilog yeligi yabo.
Uthe ukubakhona kwale liqembu bathenge Umzimkhulu G Millionaire ngo-2021 maqede balithuthela eMkhambathini njengoba isibizwa uMkhambathi FC.
“Akubanga lula neze kwisizini yokuqala sesiyiphethe kodwa saphumelela ukuqhubeka nesigaba
esingene kusona.”
“Ngesizini elandelayo sasiphokophele ukungena kwiTop 8 kodwa sasonga iligi sesikwiTop 4 okuyinto esasingazicabangi sikuyona, kodwa ngokuzimisela sagcina sikhona,” kuqhuba uXimba.
Kuwo lowo nyaka uthe bangena kwiLast 32 yeNedbank Cup abakhishwa kuyo yiCasric Stars emzuliswaneni wokuqala.
Uthe umdlandla wakhuphuka kakhulu eqenjini ngoba baqhwakela phezulu kwilog kwaze kwasongwa isizini, ngeshwa bashaywa sekusele umdlalo owawuzobadlulisela kweyokuhlungela ukukhuphukela esigabeni esilandelayo.
Kuyaqala ngqa kulendawo esentshonalanga yeTheku futhi esemakhaya ukuthi kube neqembu elihamba ibanga elingaka kule ndebe.
Uqhubeke ngokuthi kwisizini elandelayo bebelokhu beqhwakelile kwilog nosekubabeke kuyona le ndebe yodumo njengoba besanda kukhipha iLerumo Stars edlala esigabeni esingaphezulu kwesabo.
Uphethe ngokuthi akulula neze ukudlala kulesi sigaba, izinga lokuqhudelana kuso liphakeme kakhulu kanti abanabaxhasi.
Ubonga uyanconcoza kulabo abalisekayo iqembu labo ngezindlela ezahlukene kanjalo nabadlali bakhe ngendlela abazinikele ngayo, nanethemba lokuthi kukhulu kuyeza kuyanyelela. – Khula Sports