Nash Ngcobo
UKUHAMBA emhlabeni kwabalandeli nabathandi bakanobhutshuzwayo abangosaziwayo ngezindlela ezahlukene muva nje
sekuthinte izinhliziyo zobuholi bePremier Soccer League (PSL) ngokubahlonipha ngaphambi kwayo yonke
imidlalo engaphansi kwale nhlangano.
I-PSL izohlonipha laba balandeli ngokugetshiswa kwamakhanda imizuzu emihlanu ngaphambi
kokuqalwa kwayo imidlalo engaphansi kwayo neyeSouth African Football Association.
Lokhu kulandela ukushona komlandeli wokuqina waMaZulu FC uSuthu
Olumabhesh’ankone uLuyanda “Suthu Queen” Mbuyazi oshiye elimagade ekuqaleni kwale lisonto
emva kokugula isikhashana.
UQueen igama abebizwa ngalo ngabalandeli ngoba ubengazinyezi ngokuba wumlandeli wale liqembu
eyihambela cishe yonke imidlalo nemicimbi yalo. Lokhu ubekugqamisa ngokudlubha imibala yalo
nokuyiyona abezigqamisa ngayo.
Lokhu kuzinikela kwakhe eqenjini kumhlomulise ngomklomelo wokuqala wabalandeli abavunule
kahle ngemibala yeqembu labo obukhishwa yinkampani iBetway exhase isigaba esikhulu sePSL.
Omunye umlandeli nguCharles “Makhalanjalo” Fantisi we-Orlando Pirates obengayizwa nakancane
eyokuhlulwa kweBhakaniya obekhombisa lokho ngokukhihla isililo uma izinto zizibhimbela
eziMnyama Ngenkani.
Owesithathu nguMosioua Patrick “Terror” Lekota usopolitiki owadlala indima enkulu ekulweleni
ukutholakala kwenkululeko yabamnyama, uhulumeni wengcindezelo ayegweve nayo iminyaka ecela
kwengama-300.
ULekota owayengumfundi waseMariannhill Secondary edume ngeSt Francis College wayengumdlali
kanobhutshuzwayo owayengalibheki ipali.
Udlalele iClermont Home Defenders elandwa yizikhulu zayo esikoleni uma iqembu limdinga kanti
ngaleso sikhathi wayedlala noCedric “Sugar Ray“ Xulu ongasekho.
Emaqenjini esigaba esikhokhelayo ubezifela nge-Orlando Pirates kanti ngesikhathi i-ANC isavalwe
umlomo futhi isekudingisweni ubengumxhumanisi omkhulu nezikhulu zePirates ekulekeleleni
ngezidingo zokududula umzabalazo.
UMengameli wamaJaji osathatha umhlalaphansi uJudge Vuka Tshabalala naye waydlala noTerror
kulo le liqembu laseClermont, wayephambili ekulandweni kwalo mdlali uma iqembu limdinga.
ULekota udlala ibhola nje, ulisheba nokugqugquzela umzabalazo weBlack Conscious Movement
ayeyilungu layo noSteve Biko ababefunda naye khona eMariannhill.
Engakufunda futhi ngakuthanda kuLekota wukuthi izintatheli mazingambandazi ekutsheleni i-ANC
uma isiyenza okungayiyisi phambili.
Waze wenza isibonelo sokuthi ngeke ubukele intombi yayo ijuza amafinyila ungawasuli noma
uyitshele ukuthi ayiwasule ngoba uyayithanda.
Uma uyintatheli ubethi bika konke okwenzekayo ngaphandle kokukhetha ukuthi kwenziwa ngubani
(objectivity) ngisho iqembu labo malibheda, bika njengoba kunjalo.
ULekota uzofihlwa eFree State ngoMgqibelo kanti uMbuyazi uzofihlwa ngeSonto eMelmoth