Nash Ngcobo
UMPHUMELA wezifundo zokuthuthukiswa kwegalofu ezinganeni, uzobonakala emqhudelwaneni oseWindsor Park eThekwini kusasa ngoMgqibelo ngo-10h00 ekuseni. Kulo mqhudelwano kuzodlala kuwo izingane eziqhamuka kuzo zonke izifunda zeTheku.
Lezi zindaba ziqinisekiswe yiMenenja yeKwaZulu-Natal Golf Development uJoseph Kunene. “Iningi labadlali abazoqhudelana kulo mqhudelwano liqhamuka emalokishini nasezindaweni ezingathuthukisiwe.
“Lo luhlelo oseluneminyaka lukhona ludinga ukwesekwa ngabazali, yizinkampani ezizimele kanjalo nezinhlaka zikahulumeni,” kusho uKunene.
Kufika lo lusuku nje abadlali abasebancane bathole ingqayizivele yethuba lokubonakalisa amakhono abo kwiJonsson Workwear Durban Open, okuqokwe kuyo abadlali abasebancane abayi-14 abaye koqeqeshwa kwi-bootcamp.
Isasasa la lomdlalo likhushulwe wukuhanjelwa kwalezi zifundo ngabadlali abanga-60 abebezobungaza iDurban Open. UZola Ndlovu oyiMenenja eMnyangweni wezeMidlalo nokuNgcebeleka kuMasipala weTheku uthe bazoqhubeka nokunikeza laba badlali abasakhula ithuba lokuqhakambisa amakhono abo kulo mdlalo.
“Lo mdlalo phambilini ububalwa naleyo ebingabavumeli abamnyama kanti njengamanje lokho sekuwumlando, sizoqhubeka nokuveza futhi siqeqeshe abaningi abazimisele ngokukhula egalofini baze bahlonishwe wumhlaba ,” uNdlovu. Khula Sports.