Nash Ngcobo
UTHANDO oluhambisana nobunye lugubuzele umunyu kufihlwa uLuyanda “Suthu Queen” Mbuyazi muva nje.
Lokhu kufakazelwe wukuhanjelwa kwenkonzo yomngcwabo kaSuthu Queen ngabalandeli bakanobhutshuzwayo, izikhulu, abadlali baMaZulu FC namalungu omphakathi.
Kule nkonzo ebiseMelmoth Community Hall kuhlale obala ukuzinikela kukaMbuyazi ezintweni ezithuthukisa umphakathi.
Bugqame bha ubulungu bukaQueen bezepolitiki, ezenkolo, ukukhathalela intuthuko nokuba yisishabasheki kwezemidlalo. Zonke lezi zinto zifakazelekile ngabantu abebezothi ndlela nhle kule liqhawe lomphakathi.
Abalandeli boSuthu, abeKaizer Chiefs, abeRichards Bay nabe-Orlando Pirates bakhombise okukhulu ukwamukelana, bezovalelisa isosha abebegijima nalo.
Ngeke sibashiye ngaphandle abe-Inkatha Freedom Party neHis Life Church abengamalungu azo okuqina uQueen.
Lo mlandeli ngowokuqala oSuthwini nasemaqenjini amaningi engiwaziyo ophelezelwe ngabadlali, izikhulu nozakwabo ngalo luhlobo.
Lokhu kufakazelwe yindima edlalwe wuMbuyazi ekuphakamiseni uSuthu, ezintweni abelugqamisa kuzo.
Ubuholi bukaMengameli waMaZulu FC uSandile Zungu, bubeke ukuhlonishwa kwabalandeli ezingeni eliphezulu.
Sengathi zonke izikhulu nabaphathi bamaqembu kanobhutshuzwayo zingasikasika iphethini kulokhu okwenziwe nguManzini oSuthwini.
Lo moya wokuzwelana nokwesekana sengathi ungavunguza njalo kubalandeli kanjalo nakubadlali uqobo.
Le lilambu elokhelwe yiBetway Premiership lokuhlonishwa kwabadlali, abalandeli nezikhulu sengathi lingabhebhetheka njalo, bande ubuntu ebantwini.
