IBafana Bafana izoqoka isikwata seNdebe yoMhlaba

Nash Ngcobo

Woza eDurban! Le liculo elijwayele ukudlalwa uma kunemicimbi enhlobonhlobo yezikaqedisizungu
lingase lizwakale njengoba iBafana Bafana izongcweka nePanama eMoses Mabhida Stadium
eThekwini ngoLwesihlanu kusihlwa.

Kulo mdlalo umqeqeshi uHugo Broos uzocijisa ihlo lakhe lokugcina ngabadlali azogadla ngabo
kwiNdebe yoMhlaba eseMexico, Canada nase-United States of America (USA) ezoqala ngoNhlaba 11
(June) iphele ngoNtulikazi 19 (July).

Umdlalo wesibili nayo iPanama uzokuba seDHL Cape Town Stadium ngoLwesibili nakuwona
azobhekisisa ukuthi yibaphi abazozakhela ugazi naye uqobo kulo mqhudelwano iNingizimu Afrika
eyagcina ukungena kuwo ngezikhwepha eminyakeni engama-24 eyedlule.

Amathikithi alemidlalo abiza uR80 kwabadala noR50 ezinganeni aseyatholakala ezikhungweni
eziwadayisayo.

UBroos neqembu lakhe sebewubhalile owabo umlando ngeBafana Bafana nge- Africa Cup of Nations
yize bekhishwe yiCameroon ngo-2-1 kwi-Last 16.

Ukungenzi kahle kweBafana kwi-Afcon 2025, akwehlanga neze kahle kuBross njengoba esenze
izingququko eqenjini azoya nalo kwiNdebe yoMhlaba.

Kuzoba ngokwesithathu iNingizimu Afrika ingena kule ndebe ngokwezikhwepha zayo kanti uBroos
usememezele ukuthi usezothatha umhlalaphansi ebholeni emva kwalo mqhudelwano weyomhlaba.

Njengamanje kunemvunge yokuthi yimuphi umqeqeshi ongathatha izintambo zokuqeqesha iBafana
Bafana. Ngaphakathi kwiSouth African Football Association (Safa), kunabafisa ukumcela uBroos aqhubeke
kancane.

Lokhu iSafa ikwesekela ngokuthi inkontileka yayo naye khe ayimnqindi ukuthi aqhubeke uma besasibona
isidingo sakhe kulo msebenzi omuhle asewenzile.

Yonke imigomo abezibekele yona uBroos ejoyina iBafana Bafana, uyifezile futhi unconywa yiwo
wonke umuntu othathwa njengo ngoti kunobhutshuzwayo.

Indlela ebibheke kulo mqhudelwano kuBroos neBafana igqame bha ku-Group C lapho iNingiizimu
Afrika ibiqhathwe neRwanda, Benin, Zimbabwe, Nigeria neLesotho.

IBafana igcine ukungena kumafinal alendebe ngokwezikhwepha zayo ngo-2002 eSouth Korea
neJapan ifakwa wuCarlos Queiroz owaxoshwa eselindele ukubhekisa amabombo kulendebe.

Iqembu linikezwe u-Ephraim Jomo Sono nokuyilapho lagadla zephuka emzuliswaneni wokuqala.
Kuningi okungahambanga kahle kwiNingizimu Afrika, okwafakazelwa wukuthi ingaphinde ingene
kuwo njengoba isibuyiswa wuBross noHellmann Mkhalele.

Nakuba labonakala ngeye-2010, akubanga ngokwezikhwepha, lasizwa wukusingatha kweNingizimu
Afrika le ndebe nokuyinto eyayiqala ngqa emlandweni wase-Afrika.

Nakwi-Africa Cup of Nations ka-1996 yayiqala ngqa ukuyisingatha, kodwa okwaba kuhle ngayo wukuthi
iNingizimu Afrika yayinqoba okokuqala le ndele futhi yagcina.

Ithemba elikhulu ngelokuthi uBroos uyayazi indebe yomhlaba useke wadlala kuyo kanti nabasizi
bakhe bayawazi umuzwa wokudlala kule lizinga.

Lokhu kubonakale iBafana ingena kalula kumafinal e-Afcon 2025, okuyinto eyayigcina ngo-2006 e-
Egypt iqeqeshwa wuTed Dumitru, ukaputeni wayo kunguSibusiso “Rhee” Zuma nakhona eyabuya ilambatha, ingashayangha nelokubika igoli leli.

Iqembu likaBroos limi kanje-Onozinti: URonwen Williams, uRicardo Goss noRenaldo Leanor.

Abasemuva:
UKhuliso Mudau, Khulumani Ndamane, Aubrey Modiba (Mamelodi Sundowns), uThabang Matuludi
(Polokwane City), uNkosinathi Sibisi (Orlando Pirates), Ime Okon (Hannover 96, Germany) no
Mbekezeli Mbokazi (Chicago Fire –USA).

Abasesiswini:
UTeboho Mokoena, uJayden Adams (Mamelodi Sundowns), uThalente Mbatha (Orlando Pirates),
noSiphephelo Sithole (CD Tondela)

Abagadli:
U-Oswin Appollis, uRelebohile Mofokeng, u-Evidence Makgopa, uTshepang Moremi (Orlando Pirates), uThemba Zwane noThapelo Morena (Mamelodi Sundowns) – Khula Sports.