Ntobeko Mzimela
ININGI labasubathi abavela kwizinkalo zakuleli nalabo bakwamanye amazwe bazothola ithuba ngalempelasonto lokulungiselela iComrades Marathon engomhlaka 14 ku Nhlangulana kophezulu
Lokhu kuzokwenzeka njengoba isifunda saseZululand sizosingatha umjaho Zululand District Ultra Marathon yalonyaka nekhuza ibuya njengoba selokhu yagcina ngo -2019
Lomjaho owaqala ngo 2005 ugijinywa kulesifunda esinothile ngokomlando wesizwe samaZulu njengoba uzosukela esikhumulweni sezindiza esesavalwa Ondini (Ulundi Airport) uphelele KwaNongoma lapha eKing Bhekuzulu High School ngeSonto ngo-6h00 ekuseni.
Kulindeleke abasubathi ababalelwa ezi -5000 ngokusho kuka Celi Makhoba ongumqondisi walomjaho nozwakalise okukhulu ukujabula ngokubuya kwawo njengoba usuqukethe imiklomelo econsisa amathe njengoba ozonqoba umjaho omkhulu 56km ezohlomula ngezi- R100 000 owesilisa nowesifazane
Okunye okuqaphelekayo kulonyaka ukuba khona kwamanye amabanga okungu 10 km ozobe uzungeza idolobha uNongoma. Ozonqoba le libanga uzohlabana ngezi-R5000 kwabesilisa nabesifazane, kukhona no 5km ozoqala uphinde uphelele khona eKing Bhekuzulu High School.
ULoveness Madziva noNkosinathi Mhlakwana abanqoba ngo- 2019 lomjaho bazobe bengekho ngenxa yezizathu ezahlukene
Ukungenela lomjaho ngohlelo lwe inthanethi sekuvaliwe kanti kuzovulelwa labo abazozifikela mathupha Olundi Airport ngoMgqibelo ka- 18 April kusukela ngo 10:00 ekuseni kuya ku-9:00 ebusuku,kuzophinde kulandwe izinombolo ngalo lolosuku.
