ITheku likhomba i-KZN ngemigwaqo emibi yase-Outer West

Nash Ngcobo
NENZANI lapha ezweni? Lesi yisiqubulo soMnyango wezokuThutha nokuHlaliswa kwaBantu KwaZulu-Natali oholwa nguNgqongqoshe uMnuz Sboniso Armstrong Duma asibhekise kubantu abangawenzi ngeqiniso umsebenzi wabo.

Muva nje uNgqongqoshe uDuma uzishaya isifuba ngokusebenza kokuzikhandla kwamaphoyisa omgwaqo abopha kwasani oluphambana nomthetho njengoba eseqale nemiklomelo yokuwakhuthaza.

Lesi siqubulo kulindeleke siphinde sizwakale ezikhulwini ezihola lomnyango ohlangothini lwezemigwaqo eseNtshongalanga yeTheku, osekuphele cishe iminyaka engama-20 ingalungiswa njengoba imagebhugebhu.

Lokhu kufakazelwe nguMnuz Thokozani Zulu yinhloko yezomgwaqo kuMasipala weTheku othe le migwaqo okungu- P430 noP551 no-MR 385 ingaphansi koMnyango wezokuThutha KwaZulu-Natali, ayikho eThekwini.

Le migwaqo yilowo osuka ekungeneleni eHammarsdale udlule eJunction Mall, eGeorgedale uze uyohlangana no-N3 eCato Ridge.

Omunye usuka eSankotshe udlule eMophela uze uyophelela e-Eston ku-603 Mbumbulu. Isivivane Road siqala emathuneni aseMalangeni size siyophela ku-BJ Mackintosh Road ekungeneleni eSummerveld eNtshongweni.

Yonke lemigwaqo esetshenziswa mihla namalanga uHulumeni wesiFundazwe sekuphele iminyaka engazihluphi ngokuyilungisa kumbe ukuyivuselela.

Nakuba kuyakhulunywa kuMR 385 osuqaliwe ukulungiswa uma ungena ngaseKeystone, kungenxa yokulungiswa kuka-N3 eCliffdale okunye bese kuba wukuwaka abantu njengoba kuza ukhetho.

Uma usuka ekupheleni kweKeystone ubheke eHammarsdale Junction Mall akukho okwenzekayo ngaphandle kokuphesha lapha nalaphaya.

Isimo sale migwaqo sikhombisa ukuhuqa ubuthongo kubaholi abaqokwa yinhlangano ebusayo ngaphandle kokubonisana nomphakathi odinga ukusizakala.

Le li yihlazo elingephikwe wumuntu lokumosha nokungakhathalelwa kwabavoti wuHulumeni oholwa yintandokazi yenhlangano eyalwela inkululeko, kodwa muva ebukeka isifana nenja engenamazinyo.

UMnuz Zulu uthe iTheku libhekele imigwaqo emincane ephakathi nelokishi kanjalo nalowo oseGeorgedale naseSankotshe oxhumana noMR 385.

Uthe usazolumana indlebe nephini lakhe ukuthi bangalekelela kuphi njengoba isifundazwe sake saphakamisa isandla sicela ukulekelelwa yiTheku kweminye yale migwaqo.

UMnuz Ndabezinhle Sibiya okhulumela uMnyango wezokuThutha nokuHlaliswa kwaBantu usenxuswe kaningi yile liphephandaba ukuthi aphawule ngalo ludaba.

OkaSotobe umane adle amazambane athi onjiniyela abangaphawula kodwa angasiniki izinombolo zabo, okucacayo ukuthi kunezikhulu azivikelayo ekuhlulweni wumsebenzi wazo.