KWESOKUNXELE emuva: USIMON Vuma, uPius Mthanti, uMgodla Dube, uThabo Kunene, uWilfred Gcaba, uGeorge Mthembu, uChris Phekani no-G McBean
KWESOKUNXELE ngaphambili: uZephania Mthembu, uWilfred Madonsela, uNhleko, uSipho Zaca, uVuma Mfeka, uHenry “Mthofi’ Khumalo noSteven Moloane
Nash Ngcobo
IKHULA Sports ewuphiko lweSankofa Enterprises (Pty) Ltd, isembhidlangweni wokugcinwa komlando namagugu anhlobonhlobo akuleli. Elinye lalamagugu wukugubha kwe-African Wanderers FC iminyaka eyi-120 ngonyaka ozayo.
Le liqembu elazakhela ugazi ngokubhuquzisa iKaizer Chiefs nokukhiqiza osaziwayo kunobhutshuzwayo waseNingizimu Afrika, likhishwe esigabeni esikhokhelayo ngowe-2006, okungunyaka okwakufanele ligubhe ngawo iminyaka eyi-100.
Njengamanje iWanderers-AbaQulusi lidlala esigabeni esiphansi seSafa eThekwini Central League, kanti eyokulibuyisela esigabeni esikhokhelayo, yinto efiswa yinoma wubani olaziyo
USihlalo weWanderers uManqoba Mkhize oyindodana kaVusi ongasekho umema abadlali abake baligqoka ijezi loMndundu Obomvu nabalandeli, bahlanganyele naye kulomgubho, osukwini olusazomenyezelwa lwalomlando.
Nakuba engazidalulanga zonke izinhlelo zalo lusuku olusazomenyezelwa, akakufihlanga ukuthi uzoyibeka ezingeni elihluke kakhulu kunela kuqala.
Bayazi abake badlalela le liqembu ukuthi lalishoda ngani, okuyinto eheha abaxhasi nabalandeli, isibalo sabo esikhula unyaka nonyaka, ingakaphathwa eyokuthola abaxhasi.
Izimpawu zalokho ziyabonakala njengoba iqembu selinehhovisi yize lidlala obhuqwini. Abadlali, izikhulu nabalandeli nemindeni yabo yibona abazonikezwa ithuba lokuqala ukubekisa indawo kulo mcimbi.
Ngeminye imininingwane nabafuna ukuba yingxenye yalo mgubho, mabaxhumane neKhula Sports ku-0833010869 email:johnngcobo1192@gmail.com