Nash Ngcobo
IZiNGANE zaseKenville Primary ziphakamise ifulegi lesi sikole ngokuba ngompetha bokuqala beLuyanda Gumede Golf Tournament ebiseNu Range eHillcrest.
Lesi sikole sidle umhlanganiso kwiBest Swing ethathwe ngu-Awandile noweBest Player of the Tournament uMathobela.
OweMost Charismatic Player kube nguDevdan Govender waseSarnia Primary. Lo mqhudelwano oqale ngoNovember 22 e-UKZN Golf Range wasongwa eHillcrest usuzobakhona minyaka yonke.
USidney Gumede ongumdidiyeli wawo ubonge abazali ngokuvumela nokweseka izingane ukuba yingxenye yokudlala igalofu.
” Inhloso enkulu yalo mqhudelwano wukufaka uthando lwalo mdlalo ezinganeni, zikhule nawo.
“Lokhu kuzozicija ekuhleleleni ikusasa nezinselelo ezinhlobonhlobo zempilo ekukhuleni kwazo,” kusho uGumede.
Ezikoleni ezinhlanu zamabanga aphansi okuyiSarnia, iKenville, iBarracuda, iSimla neLivingstone bekuqokwe abadlali abahlanu.
UGumede ubonge abaxhasi okuyiCTM yaseProspecton, iKZN DSAC nabanye abangathandanga ukudalulwa.
Unxuse nabanye ekuxhaseni ekufundiseni ngalomdlalo, othathwa njengobizayo kodwa onezinzuzo ezinkulu.
Ucele othishanhloko nalabo ababhekele ezemidlalo ngokwemukela igalofu njengeminye imidlalo edlalwa futhi kufundiswe ngayo ezikoleni.
Uthe ufisa ukwelekelelwa kakhulu kwezokuthutha izingane kanjalo nokokuya ethunjini uma kuqedwa ukudlala.
Okwezimpahla zokudlala uthe kungeza kamuva, okubaluleke kakhulu wukudla nezokuthutha nokuyizinto eziqinisa, zithuthukise ubunye nokwamukelana bese kuqedwa nya ukucwasana.
Abafisa ukuletha izingane zabo kulo mdlalo bangashayela uGumede ku-0833335242 noMinenhle ku-0721540942.