womshayi magoli ovelele kwi-Afcon 2025i
Nash Ngcobo
UKUZINZA kwamaqembu asentshonalanga nokuqubuka esiswini kwawasenyakatho ye-Africa kwi-Afcon 2025, kuzojabulisa abalandeli njengoba kuzodudulana amaqembu alezi zindawo.
Isasasa lalo mdlalo wukuthi akwaziwa mbhantshi kujiya njengoba ifinal kulindeleke ibe phakathi kwentshonalanga nenyakatho kanti abanye balindele idlalwe ngawasentshonalanga kuphela.
Umdlalo weQuarterfinal yalo mqhudelwano uphakathi kwe-Egypt esibe ngompetha balendebe kasi-7 ezodudulana kuwo neSenegal engompetha bango-2021.
Ngawo lonyaka okunqobe kuwo iSenegal ibidudulana nayo i-Egypt njengoba uphondo luze lwagoba kwi-The Pharoahs sekushaywa amaphenathi. Lo mdlalo uzodlalelwa eGrande Stade de Tangier ngo-17h00.
Owesibili uphakathi kweNigeria neMorocco ePrince Moulay Abdellah Stadium eRabat ngo-20h00, okulindeleke kuwo ulwazi nokuzimisela.
INigeria muva nje ivutha bhe emapalini njengoba isishaye amagoli ayi-14 emidlalweni emihlanu yalo mqhudelwano kanti isiwunqobe amahlandla amathathu.
Izinkinga ezibhekane nale liqembu okubalwa ukungakhokhelwa kwabadlali izimali zabo zokuba sekhempini nama-bonus.
Kuvale eyokukhishwa yi-DR Congo kwiNdebe yoMhlaba ezodlalwa eMelika, Mexico naseCanada ngoNhlangulana. Sekuyihlandla lesibili iNigeria ingangeni kwiNdebe yoMhlaba
Nakuba kuyakhulunywa, kulamule ukungenelela komdlali weBesiktas uWilfred Ndindi othembise ukukhokhela abadlali zonke izimali abazikwelethwa yiNigerian Football Federation.
Kwenzeka lokhu nje abagadli beSuper Eagles oVictor Osimhen no—Ademola Lookman abangalibheki ipali, abakhombisi ukuphatheka kabi kwabo okufakazelwa ngamagoli aseshaywe wu-Osimhen.
Umdlali wale liqembu othwelwe ngeqoma esicocweni somshayimagoli ovelele kusengu-Osimhen, okubikwa ukuthi usezithendeni zikaRachidi Yekini ongasekho ophethe irekhodi lokushaywa kwamagoli.
IMorocco yona iyincwadi evaliwe njengoba yagcina ukunqoba lo mqhudelwano ngo-1978 kanti ukuhlangana kwabadlali bayo kufakazelwe yindlela abawashaya ngayo amagoli.
Igcine ukubonakala kulo mqhudelwano ngo-2004, emva kwalokho ibibalwa namaqembu angadluleli esigabeni esilandelayo.
Okwesibili ivunwa wukwesekwa yinkundla njengoba ingosokhaya kanti ukunqoba kwayo kuzovuna ukulandelwa kwayo kwiNdebe yoMhlaba ka-2030 ezobe isingathwe yiMorocco okokuqala ngqa.
Khula Sports