Nash Ngcobo
ISHAYELWE elikhulu ihlombe iDurban City FC ngokuba yiqembu lokuqala KwaZulu-Natali ukunqoba iNedbank Cup.
Lokhu ikwenze ngokwehlula iTS Galaxy ngo-2-1 kwifinal yale ndebe ebiseNew Peter Mokaba Stadium, ePolokwane eLimpopo ngoMgqibelo.
Amagoli enqobe ngawo iCity ashaywe nguMfanafuthi Mkhize oqokwe njengomdlali wosuku noJean Lubumba oqale wehlelwa yishwa lokushaya igoli ekhaya nokuyilona lokubika leGalaxy.
Ifinyelela kulesi sigaba nje iCity, kuningi abadlali bayo abedlule kukhona okubalwa ukushintshwashintshwa kwabaqeqeshi, kodwa bavuke bazithatha.
Ukuvuka bazithathe kwabadlali, kubonakale ngokuqeda indlala yeminyaka eyi-17 yendlala yezindebe emaqenjini aseKZN.
Le ndebe ehambisana noR7 000 000 izofaka iCity kwiCAF Confederation Cup nokuyinto ezobuyisa isithunzi seKZN kunobhutshuzwayo.
Ibuyisa le njabulo nje iCity ibithwelwe ngeqoma wuNgqongqoshe wezeMidlalo, ezokuNgcebeleka namaSiko uMntomuhle Khawula, ohlala egqugquzela ukwanda kwamaqembu ePSL KwaZulu-Natali kanjalo nabasemaqenjini kazwelonke.
Lokhu ukufakazele ngokuhlinzeka abalandeli ngamabhasi amahlanu ukuyokhomoza abadlali kule final. Akagcinanga ngokukhipha amabhasi naye ubekhona emdlalweni emele uHulumeni waKwaZulu-Natali.
IMeya yeTheku uKhansela uCyril Xaba uhalalisele iCity ngale mpumelelo. Uthe ezemidlalo seziphenduke isiqalo sokukhushulwa komnotho.
I-University of KwaZulu-Natali ayisalanga ngaphandle, ekubongeleni le liqembu elinobudlelwano nayo kuyo yonke imikhakha yokuphila.
UMqondisi Omkhulu wezoXhumana kule nyuvesi uNks Normah Zondo uthe lokhu kuzoqinisa amaxhama okubambisana kwabo nokugqugquzela yonke inhlobo yenqubekela phambili nxazonke. Khula Sports