ITheku lishayelwe ihlombe ngeyezemidlalo

Nash Ngcobo
UKUHLELA okokuqala kukaMasipala weTheku umcimbi wokuhlonipha abezemidlalo kushayelwe elikhulu ihlombe wuMnyango kaZwelonke wezeMidlalo, ezokuNgcebeleka namaSiko, okuyinto eyivela kancane komasipala abaningi.

Lokhu kuzwakale enkulumweni kaDkt Stella Khumalo onguMqondisi Jikelele ngenkathi ebongela osingaye nabadidiyeli balo mcimbi obizwa eThekwini Recognition Sports Awards asanda kuba se-Inkosi Albert Luthuli International Convention Centre.

UDkt Khumalo uthe iNingizimu Afrika isisemgudwini okuyiwona wona kanti imisebenzi kaDkt Siphiwe Ndlovu noDkt Vusi Mazibuko yokuhlela lomcimbi wokuqala ngqa izoqhubeka nokubeka iTheku ebalazweni likazwelonke.

“Njengomnyango kazwelonke siyayithakasela yonke imicimbi yalo luhlobo eyenzeka ezindaweni zethu ezahlukene.

“IProject 350 esungulwe ngo-2024 ngenhloso yokukhiqizwa kweNingizimu Afrika ngabadlali abangama-300, kuthi abangama-50 kube ngabaphila nokukhubazeka abazoyimela kuma-Olympics ka-2028.

“Siyalihalalisela iTheku ngalo mcimbi kanjalo nokuphakamisa kwalo igama emadolobheni asembangweni wokulethelwa kwe-2036 Olympic Games, okubukeka kungeke kube yinkinga.

“Kuzokwenzeka njengoba iTheku lisemadolobheni aseNingizimu Afrika azolethelwa iNdebe yeKhilikithi yoMhlaba ka-2027. Amanye amazwe azothola le lithuba yiNamibia neZimbabwe,” kusonga uDkt Khumalo.

Kule livelakancane lalo mcimbi weTheku, kugqame umdlalo wegalofu okhula ngesikhulu isivinini kwabamnyama ohlabane emikhakheni weRising Sports nakoweMayoral Special Award.

Laba begalofu nguLuyanda Gumede (10) ohlabane ngeRising Sports Star Award kwazothi imenenja yesifundazwe saKwaZulu-Natal uJoseph Kunene waklonyeliswa ngeMayoral Special Award.

UNkosini Ngubane uklonyeliswe ngeCertificate of Recognition ngomsebenzi awenza ekuthuthukiseni umdlalo wehockey.

UManqoba Mkhize ugixabezwe ngeye-Exposing Football Talent ngokukhulisa nokuvulela abadlali bakanobhutshuzwayo amathuba emqhudelwaneni iKhabba Cup.

Owe-Adapting Sports Excellence, uthathwe nguSabelo Ngema ogila izimanga kwisurfing.

KwiYouth Excellence kuqokwe kunqobe uTeme Areliah Govender ongumdlali weTable Tennis, eyeDevelopment Coach of the Year ithathwe nguMfanafuthi Ntombela webasketball.

Kuvale eyeDistrict Excellence ethathwe nguDistrict 1. Abasalanga ngaphandle bonke asebalala kobandayo, nabo bahlonishiwe ngaphansi kwesiqubulo- “Gone But Not Forgotten”