Nash Ngcobo
ABALANDELI baMaZulu FC uSuthu Olumabhesh’ ankone bazobhekisa amabombo emhlanganweni omkhulu osePrincess Magogo Stadium ngoLwesihlanu ngo-10 kuya ku 14h00.
Lo mhlangano ubizwe nguMengameli woSuthu uSandile Zungu, azokwethula kuwo izinguquko ezizokwenzeka eqenjini.
Njengamanje iqembu lisemkhankasweni wokukhuphula isibalo sabalandeli,okuyinto ebhekwa yinoma yiyiphi inkampani enxenxelwa ukuzoxhasa iqembu.
Kulindeleke ukuthi uSuthu lube selinabalandeli abayi-1000 000 ngowe-2032, okungunyaka oluzogubha ngawo iminyaka eyi-100 lasungulwa yiSilo uMaphumuzana kaDinuzulu ngo-1932.
Enye injongo yalo mhlangano wukuqinisa ukubambisana phakathi kwamagatsha abalandeli nehhovisi, okuyinto ezojabulisa abaxhasi ihehe nabanye abaningi.
Phezu kwakho konke okuzobuyisa abalandeli, akukho okwedlula ukunqoba kweqembu ikakhulukazi imidlalo yasekhaya, ekuhambeni okungenani libuye nephuzu.
Ukusayiniswa nokuboshelwa kwabadlali abasebancane kanjalo nabendawo, yibona bulawu beqembu ekuheheni abalandeli.
Olunye udaba okuzokhulunywa ngalo olokuvuswa kwamaziko abalandeli oluzobizwa ngezifunda (regions)
Lezi zifunda zizokhula bese zizala uhlaka lukazwelonke (National Executive Committee) oluzomela wonke amaziko ngenhloso yokuxazulula ngokushesha noma yiyiphi inkinga ekukhulisweni kwesibalo sabalandeli.
Abadlali boSuthu kufanele bazi ukuthi baqashelwe ukunqobela iqembu isicoco kunoma yiyiphi isizini ngoba bayakuholela lokho njalo ekupheleni.