Kufezeke amaphupho ezikoleni kweyeKay Motsepe

Nash Ngcobo

OMPETHA bakazwelonke kunobhutshuzwayo bezigaba ezintathu zeKay Motsepe Schools Championship, bahlukaniselane isamba sezi-R8.6 (million) ngokuhlabana kwabo kweyamanqamu ebiseGauteng muva nje.

Lezi zikole ezihlabene kulomqhudelwano oxhaswe yiSanlam kube yiNavalsig High enqobe kubafana baka-U/19, iQueenswood Laerskool kubafana baka-U/13 neSt Marks Academy emantombazaneni ka-U/13.

Laba bafundi abaqhamuka ezindaweni zasemakhaya abebeqala ukufika eGauteng bezodlala ngaphambi kwabaqeqeshi nabahlwayi bamathalente, kufezeke amaphupho abo ngokuthola ithuba abangasoze balikhohlwe kalula emlandweni wabo.

Le lithuba liphelekezelwe yinhlanhla yokugoduka nendebe ehambisana nezigidi nezinkulungwane zamarandi ezizokwenza ngcono amagumbi okufundela, izinkundla zemidlalo enhlobonhlobo okuzosizakala kuzo nemiphakathi eminyakeni ezayo.

Olunye usizo kungaba ngolokwakhiwa kwengqalasizinda efana nokudonswa kwamanzi emhlabathini (boreholes), ukwakhiwa nokuvuselelwa kwamagumbi okufundela, ihholo, umtapo wezincwadi ne-science laboratory.

Yonke imali okuklonyeliswe ngayo labo mpetha nalabo abafinyelele kumafinal alo mqhudelwano, izoshiya ifagugu leminyaka eminingi ezayo, kugqugquzeleke nabanye abalandelayo ukuzibandakanya
kwezemidlalo.

I-St Marks engompetha banyakenye kubafana baka-U/19, iphinde yabonakala isiklonyeliswa ngesi-R1 (million) ifezekisa ukuthi okwenziwe ngabafana, namantombazane angakwenza.

INavalsig High yaseFree State yehlule i-Urban Academy yase-Eastern Cape ngo-2-0 maqede yafaka emxhakeni izi-R3 (million) I-Academy ihlonyuliswe ngezi-R700 000.

Isithathu siye kwiClapham High eklonyeliswe nge-R600 000 ngokunqoba ngo-3-0 iNtsu Secondary yaseFree State yona ethotshwe inhliziyo ngezi-R500 000.

Esigabeni sika-U/13 wabafana iLaerskool Queenswood yaseGauteng inqobe iSt Annes Primary ngo-1-0 maqede yaklonyeliswa ngezi-R1 (million).

Kwathi iSt Annes yagoduka nezi-R400 000.

IPotch Primary yaseNorth West engene isithathu ngokunqoba iBelfast Primary yaseMpumalanga iklonyeliswe ngezi-R300 000 kwathi iBelfast yagoduka nezi-R200 000.

Emantombazaneni ka-U/13 iSt Marks yaseMpumalanga iklonyeliswe ngesi-R1 (million) ngokwehlula Ulwazi Primary ngo-3-0. Abalale isibili bathole izi-R400 000.
ISt Annes ilale isithathu yathola izi-R300 000 kwazovala iSterkspruit Primary yase-Easten Cape esule umlomo ngezi-R200 000 ngokungena isine.