Nash Ngcobo
UKUNGAHLELEKI ngokuqalwa kweligi yemidlalo yezikole, akuliqedanga amandla Ichibi Community Upliftment ukubuyisa le midlalo.
Lokhu kufakazeleke ngemidlalo kanobhutshuzwayo nebhola lomnqakiswano obekududulana kuyo ama-primary ayi-16 nama-high ayo-12 muva nje.
UZamo Shezi ongumgqugquzeli wale midlalo ebukeka isasasa layo lingalingani nokukhulunywa ngayo ubonge iMkhelele Towing ngokuyixhasa, Embo Ilanga Tribal Authority kanjalo noNtethelelo Lembede ofundisa eKwandeni noThandiwe Gwala waseHalala Primary.
Akakhohlwanga yizindondo abaxhaswe ngazo uMnyango wezeMidlalo, ezokuNgcebeleka, ezobuCiko namaSiko KwaZulu-Natali.
Imidlalo yenetball ibidlalelwa eChief Luthayi High kanti unobhutshuzwayo ubuse-Indlulamithi Sports Ground.
UShezi we-Ichibi okuyinkampani engenzi nzuzo uthi inhloso yabo enkulu wukuvikelwa kwezakhiwo zezikole ngokuthi kwande imidlalo ezikoleni.
“Ukungadlalwa kwemidlalo enhlobonhlobo ngoba zingekho izinkundla, kubhebhezela izikhohlakali ezakha imizi emagcekeni ezikole.
“Laba bantu bakha kula magceke ngemvume yeziphathimandla ezikhohlakele.
“Neziphathi mandla zikahulumeni nezezinhlobo zemidlalo azibonakali zivimba ukwakhiwa kwezindlu kulezi zinkundla,” kusho uShezi.
Uqhubeke ngokuthi azikho izinkundla zenetball, i-basketball, i-tennis court ne-swimming pool.
Inkundla yenetball ekhona iseChief Luthayi High nayo eyakhiwe nguBongiwe Msomi owayefunda kuso lesi sikole osengumqeqeshi wenetball.
Uphethe ngokunxusa zonke izinkampani nosomabhizinisi ngokwelula isandla ekuxhasweni kwemidlalo yezikole. Khula Sports
