Nash Ngcobo
ABATHANDI besibhakela baseNingizimu Afrika bazobhekisa amabombo kwiFighters Club eWild Coast Casino ngoMgqibelo.
Lezi zimpi ziholwa ngezimbili zemizuliswano eyi-10, eyodwa yazo kubangwa isicoco se-IBO World Junior Lightweight esingaphethwe ngumuntu kwabesifazane.
Abashayisibhakela abazobanga lesi sicoco nguBernice Ferreira waseNingizimu Afrika no-Ellen Simwaka waseMalawi.
Impi eyeseka lena kuzobangwa kuyo ese-International Bantamweight phakathi kukaLandile Ngxeke wakuleli noJonas Matheus waseNamibia.
KwiJunior Middleweight yemizuliswano eyi-8 kuzolwa uJarred Silvermann waseGauteng noKhumbulani Mdletshe waseKZN.
KweseJunior Bantamweight kwabesifazane kuzoxhimfana uKabisile Tshabalala waseGauteng noThema Zama waseKZN kweyemizuliswano eyi-6.
Ezemizuliswano emine zona ziqhathwe kanje.
KwiJunior Flyweight kwabesifazane kuzodudulana u-Emma Mohono waseFree State no-Elizabeth Ndlovu waseZimbabwe. Lena ngeyemizuliswano emine.
KwiMini Flyweight yabesifazane uJo-Lee van TondervwaseGauteng uzobhekana noLerato Malefane waseFree State. Lezi yizimpi zabo zokuqala esigabeni esikhokhelayo
Kwabesilisa emizuliswaneni emine uJordan Peace ulwa noThabiso Makhanya. Bobabili balwa kwiJunior Middleweight kanti baqhamuka KwaZulu-Natali.
KwiFeatherweight uRicardo Shaw noLibuyile Gawuza. KwiJunior Featherweight u-Akshay Singh uqhathwe noCebelihle Mpanza.
Izimpi ziqala ngo-6h00 kusihlwa. Amathikithi aqala ku-R150 kwabamile, uR365 kwabahlezi kuvale uR2000 kuma-VVIP. Khula Sports