Lugujwe ngeminxa emithathu olwamagugu e-Appelsbosch

Nash Ngcobo

KUGQAME inkolo, imfundo nezempilo emcimbini wokugubha usuku lwamagugu namasiko njengoba kusungulwe okokuqala umzila wezokuvakasha oxubene nezenkolo Ozwathini nase-Appelsbosch okuyizindawo ezimaphakathi neKwaZulu-Natali.

Kule micimbi ebisingethwe yiTourism KwaZulu-Natal, uMshwathi Municipality ne-Evangelical Lutheran Church of Southern Africa, kugujwe iminyaka eyi-100 kwasungulwa imishini yase-Appelsbosch enesibhedlela nekolishi lothisha besifazane.

Kuzo zombili lezi zindawo kugqame igalelo lenkolo, ezemfundo nezempilo okuyizinto ezafika namakholwa aqhamuka emazweni aphesheya kwezilwandle.

Ozwathini kukhunjulwe umfeli wokholo uNtombazane wakwaNsele, owabulawa nguyise uQanana ngoba ekhethe ukholo, okuyinto ngaleyo minyaka eyayimataniswa nokuvuna ukuthathwa kwezwe
labamnyama ngabamhlophe.

UMbhishobhi uNkosinathi Myaka uthi alaziwa igama lale ntombazane, eyaqoka ukuyohlala emgedeni ngenxa yokuthi uMfundisi uSven Erickson owayelethe ukholo wayesenyama nambana emphakathini.

Lokhu kwenzeka emva kwempi yaseSandlwana kaZulu namaNgisi kanti inkolo yalethwa ngamaSwidi (Sweden) eBandla i-Evangelical Lutheran Church of South Africa (AmaLuthela).

UNgqongqoshe wezokuThuthukiswa koMnotho, ezokuVakasha nezeMvelo KwaZulu-Natali uMfundisi Musa Zondi uliqhakambisile iqhaza elabanjwa ngabalethi bokholo KwaZulu-Natali njengoba bekugujwa iminyaka eyi-100 kwakhiwa isibhedlela i-Appelsbosch.

Konke lokhu uNondaba ukwenza ngokubambisana noDkt Sibusiso Ndebele onguSihlalo weKZN Tourism And Filming Authority, osemnkantsh’ubomvu kwezokuhola umphakathi nokuhwebelana kweNingizimu Afrika namazwe angaphandle.

UMfundisi Zondi uthe yize sesiphucukile, siyizifundiswa futhi ezingamakholwa, akukho nokuncane okusihlukanisa nemvelaphi yethu, siyohlala siyilokhu esazalwa siyikho futhi akufanele silahle ubuthina.

Unxuse zonke izifundiswa zendawo ngokubuya zizothuthukisa lapho zizalwe zakhulela khona, zizovula amathuba emisebenzi, kusizakale umphakathi ukuze kuthuthuke ingqalasizinda nomnotho wendawo.

IMeya kaMasipala uMshwathi uKhansela Mandla Zondi ucele uNgqongqoshe ngokubakhumbula esabelweni esilandelayo somnyango ekuthuthukisweni kwezokuvakasha e-Albert Falls Dam nokwakiwa kwe-Zipline kwenye yezintaba zendawo.