Luzoqhubeka ngokuvulwa kwezikole olwekhilikithi yezikole

Nash Ngcobo
LUZOQHUBEKA ngokuvulwa kwezikole uhlelo lokufundiswa kwezingane zesikole ikhilikithi olubizwa ngeKFC Mini Cricket Community Festival, oluqalwe ngomgubho we-International Day of Play eMpophomeni Sports Ground eHowick.

Lo luhlelo oluzokwenziwa kuzo zonke izikole zaKwaZulu-Natal lulethwa yiCricket South Africa (CSA), iKwaZulu-Natal Cricket Union (KZNCU) ne-Inland Cricket kanti seluxhaswe yiKentucky Fried Chicken (KFC) iminyaka eminingana.

Inhloso enkulu yalo luhlelo wukufinyelela kwezifundo zalo mdlalo kuzo zonke izikole ngaphansi kohlelo lweMini Cricket ngokuvundulula amakhono acashile ikakhulukazi ezindaweni ezisemakhaya nezingathuthukisiwe.

I_CSA isihlukanise iKwaZulu-Natal kabili ngenxa yobukhulu bayo. Zonke izindawo ezingaphansi kweTheku nezigudle ugu lolwandle, zizokwenganyelwa yiKZNCU.

Kuzothi zonke ezimaphakathi, ezisenyakatho nentshonalanga yesifundazwe zibe ngaphansi kwe-Inland Cricket, amahhovisi ayo ase-Oval Cricket eMgungundlovu.

Izikole ebeziyingxenye yale festival yiZamokuhle, iQhamukile, iNogqaza, iCosmo, iThembelihle, iSbongo neNhlanhleni Primary zonke ezingaphansi kwe-Inland Cricket.

Ngenkathi lomdlalo uqhubeka, ufezekisa ilungelo lokudlala kunoma yiyiphi ingane uphinde ulethe ukuqala kwempilo entsha kubathandi nabalandeli bekhilikithi eMpophomeni.

Isikhulu esiPhakeme se-CSA Domestic Cricket uDavid Mokopanele uthe lo lusuku iCSA ifuna ukukhombisa ngalo ukuzinikela kwayo ekuthuthukiseni ikhilikithi emphakathini.

“Ukubambisana kwethu neKFC, izikole, othisha nabaqeqeshi abazinikele, izakhiwo zomphakathi ezifuna lomdlalo kuzovula indlela entsha yokuphila nokuletha amathuba anhlobonhlobo kubo bonke abazibandanye nawo.

“Lusazoqhubeka nokukhombisa amandla ezemidlalo lolu hlelo nokukhuliswa kwekhilikithi kuzo zonke izindawo ezinabantu abafuna ukuyidlala,” kusho uMokopanele.

U-Andre Nel oyiNhloko ye-Corporate Affairs yeKFC Africa uthe lo luhlelo luzonika nomphakathi ithuba lokubona ukunwetshwa kwamandla ezemidlalo.

Usonge ngokuthi usejahe ukubona uhlelo olulandelayo ukuthi luzonwetshwa kanjani ukuze lufinyelele emiphakathini oludingayo.

Abafuna ukufunda lo mdlalo kanjalo nokuxhunyaniswa neziphathimandla bangashayela Isibukosenzwe Online ku-0833010869.