UNtencane unxusela abaseMzinyathi kwiDundee July

Nash Ngcobo

UMCULI womculo wesintu oshisa izikhotha muva nje, unxusele ozakwabo ukuba baqashwe kwiDundee July.

Lo mculi nguSenzo Zondi waseShane eMdlovana odume ngoNtencane, ocele kubadidiyeli balo mcimbi ukuthi itende netende liqashe iciko noma iqembu eliqhamuka eMzinyathi.

UNtencane ukusho lokhu emcimbini obekwethulwa kuwo lomcimbi osiqubulo sawo sithi ” Elegantly African – Kuzoba Lit.”

Ukhuluma kanjena uZondi, usengaphakathi njengeciko elizonandisa kwiDundee July ezogubha iminyaka engama-21 ngoNtulikazi 18 (July).

Okumnandi nokuthokozisayo ngalo mcimbi odle ngengqephu, ukubhejelwa kwamahhashi omjaho wesintu ukutelebhela kanjalo nokunikeza osomabhizinisi bendawo ithuba lokulala benemadlana kunasemihleni, zinkulu izinhlelo zokuwukhulisa kunalokhu oba yikho unyaka nonyaka.

“Wonke amaciko aseMzinyathi ngiyawacelela kuHulumeni nakubaxhasi beDundee July ukuthi aqashwe etendeni netende elizogxunyekwa kulo mcimbi, kwazise phela aabzobe ejabulisa abantu balapho eqhamuka khona,” kusho uNtencane.

Ukhuluma kanje uNtencane lo mjaho nalo mcimbi kulindeleke ushintshe izimpilo zabo bonke abayingxenye yawo.

Lokhu kuqinisekiswe ngesinye sezikhulu esibhekele ukukhula kwalo mjaho uSandile Mbonane, othe akusekude ufane naleyo ekhokhelwayo futhi ulandelwe kakhulu ngabantu bakuyo yonke imkhakha yempilo.

“Sizoqala ngokwenza ngcono izimpilo zojokhi, abaqeqeshi, abanikazi bamahhashi, abahlanzi nababhekeli bawo, odokotela, abazalanisi bawo kuvale abatshali nabapheki bokudla kwawo,” kusho uMbonane.

Enkulumweni kaMbonane akusalanga ukubhalwa nokugcinwa komlando wezitebela aqhamuka kuzona amahhashi kanjalo nezindawo aqeqeshelwa kuzona.

Uphethe ngokufakwa kwalo mdlalo ezikoleni wanxusa iziphathimandla zezemidlalo nezemfundo ngokwenza lokhu kube lula ukuze usheshe ungene ezinhlelweni zemidlalo yezikole.