Uyivule ngenjabulo eye-Afcon 2027 uMosimane

Nash Ngcobo
UMQEQESHI weBafana Bafana uzobhekana neKenya emdlalweni olandelayo wokuhlungela i-Afcon 2027, uzodlala lomdlalo engenankinga yesikwata esizobuyisela phezulu iNingizimu Afrika ezilinganisweni zeConfederation of African Football (CAF).

Lokhu kulandela ukuvula kukaPitso Mosimane ngokunqoba imidlalo emibili yokuhlungela i-Afcon 2027 anqobe kuyo iGuinea ne-Eritrea ngaphandle kobunzima.
Isikwata sabadlali abangama-30 abesiqokile uMosimane ngaphambi kwale midlalo, usihlole kule midlalo emithathu aseyidlalile okubalwa nowesihle ne-Egypt.

Yomithathu le midlalo iBafana Bafana iyinqobe ngaphandle kobunzima nokuletha elikhulu ithemba ngabadlali abasebancane lokukhuphula kakhulu izinga leNingizimu Afrika uma bengavuvukelwanga ngamakhanda.

UMosimane wenze okungajwayelekile kwaziwa ngakho kokuba nenkani, walalela atshelwe kona ngokungasihlakazi isikwata ebesiqokwe nguHugo Broos esilethe olukhulu uguquko kwiBafana Bafana.

Asethembe iSouth African Football Association izomeseka kukho konke akudingayo uMosimane ukuze iBafana Bafana ibalwe namaqembu esizwe enza kahle.

Khona manjalo uRaymond Mdaka oqeqesha izwe iqembu likazwelonke lika-U/20 kufanele ashayelwe elikhulu ihlombe ngokuvikela indebe yeCosafa okwesithathu iminyaka emithathu ilandelana.

Kulo nyaka iCosafa U/20 ibidlalelwa eMozambique kanti lokhu kunqoba kuyibeke ethubeni lokungena kwi-Afcon U/20 ezodlalwa ngonyaka ozayo.

Muva nje lizidlela amahlanga emidlalweni yesihle yokulungiselela imidlalo yokuhlungela ama-Olympics azodlalelwa eCalifornia e-United States of America ngo-2028.

Ukwenza kahle kwale liqembu likaMdaka kudalwa wukuthi iningi labadlali agijima ngabo liyazana futhi yilona elinqobe i-Afcon 2025 laze layongena kwiWorld Cup U/20.

Isikwata uMosimane nabasizi bakhe avule ngabo eyokuhlungela i-Afcon 2027 besimi kanje nakuba ababili bengadlalanga ngenxa yokulimala.

Onoziniti:
URonwen Willams, uSipho Chaine noRicardo Goss.
Abasemuva:
U-Aubrey Modiba, uSamukelo Kabini, uFawaaz Basadien, uKamogelo Sebelebele, uThapelo Morena, uNkosinathi Sibisi,
uThabang Matuludi, u-Olwethu Makhanya, uLebo Seema noKhulumani Ndamane.
Abasesiswini:
UTebogo Mokoena, uLebohang Maboe, uSiphephelo Sithole, uBathus Aubaas noBrooklyn
Poggenpoel.

Abagadli:
U-Iqraam Rayners, uYanela Mbuthuma, uCassius Mailula, u-Oswin Appollis, uPutso Dithejane,
uTashreeq Matthews, uRelebohile Mofokeng, uThemba Zwane, uThapelo Maseko, uTshepang
Moremi, uLuther Singh noShandre Campbell.