Izokhula noMandela iDundee July

Nash Ngcobo

IDUNDEE July ezogubha iminyaka engama-21 kulonyaka, kul.indeleke kufike usuku lomjaho isibhejelwe isamba esiyizigidi ezintathu zamarandi (R3 million).

Lokhu kulandela ukuthi kiufike usuku lokwethulwa kwawo sekubheje abayi-2500 wezigidi emijahweni eyi-12, okuzogabavula kuwo amahhashi angama-340

Lo mjaho okhula unyaka nonyaka ngokwezinga, kulonyaka uzogijinywa ngoJuly 18 Endumeni Race Track eDundee, okulindeleke kulo yonke inhlobo yenjabulo.

Lo lusuku lungolunye olubalulekile emhlabeni nasemlandweni waseNingizimu Afrika njengoba kwazalwa ngalo uDkt Nelson Mandela uMengameli wokuqala kaHulumeni weNtando yeNingi eNingizimu Afrika.

Luzogcwala injabulo embonini yezokutelebhela, luzokhuphula umnotho ezinhlakeni ezahlukene zeDundee July nemboni yamahhashi.

Lokhu kufakazelwe nguMenzi Buthelezi ongusihlalo weKZN Traditional Horseracing, obonge wanconcoza ekusekelweni kweDundee July neminye imijaho wuNgqongqoshe wezeMidlalo, ubuCiko namaSiko KwaZulu-Natali uMntomuhle Khawula.

Lo lusuku luletha omkhulu umnotho kubasiki bengqephu, abakhangisi bayo, abanikazi bezindawo zokulala, abadayisi bokudla nokuheha izinkampani ezizowuxhasa ngomuso.

UNgqongqoshe uKhawula udalule ukuthi lukhulu luyeza luyanyelela oluzobeka lomjaho ezingeni elilinganiselwa emijahweni emikhulu ekhokhelayo.

“Umtelebhelo awusophinde ufane nezikhathi zakudala okwakuklonyeliswana kuwo ngezibhalala zokulala, izimbuzi neziklabhu.

“Lo mjaho uzoshintsha izimpilo zabo bonke abamdibi kuwo kuze kuyofinyelela emindenini yabo,” kuphetha uKhawula.

Hlala ulindile Isibukosezwe Online sizokwethulela ukusuka nokuhlala ngokuthuthukiswa komtelebhelo nakho konke okuhambisana nawo.